..................دهيمات الوردي .....................
......................وصايا لكبار ......................
خيار لوصايا تديها من لكبار...........هوما لي عاشو في ذي الدنيا شافو
يقلك يلا نويت لخير قدم ليه ..........لي نوى الخير ربي يوقف في كتافو
ولي ينوى الشر غير بعد عليه........الشراني كي التاتة يبدل في وصافو
العمر قصير شوف كيفاه تعديه........ حط في بالك الميت بلبيض كان لفافو
لا تكثر من الشي لي قلبك باغيه........الكثرة منو تخلي نفسك تكره وتعافو
وباباك كل صباح سلم على يديه........يلا رضى عليك مكان شي تخافو
و يا سعد مون دار يماه في عينيه.......في جنة الرحمان راح يكون تشرافو
و السر نوصيك غير حافظ عليه .......و حطو في بير يكون عامق تجوافو
أخدم واش لقيت لا تمد يدك للسوال......بعد الخدمة تغسل يديك رايحين ينظافو
أحرز من لحرام وكول غير لحلال .......لحرام كي الشوك تتغطى بلحافو
ما تهنا ما تربح ما تشوف راحت البال .....الدورو لحرام ماكان بركة في تصرافو
هذا ما وصاني بيه جدي من كثير قوال.......وهذا ما نطق بيه لسانو وشفافو
قالي يا وليدي أصبر مهما كان الحال .........و يا سعد مون كان الصبر و لافو
خيار لوصايا تديها من لكبار ...............هوما لي عاشو في ذي الدنيا شافو
ليست هناك تعليقات:
إرسال تعليق